Santiago de Compostela, xoves, 17 de novembro de 2022. Francisco Saborido Rey foi reelixido como director do Instituto de Investigacións Mariñas (IIM) para os próximos catro anos. O equipo directivo que o acompañará nesta etapa está formado por catro vicedireccións, dúas delas adscritas que continúan o labor dos últimos catro anos.
“O verdadeiro obxectivo do proxecto de dirección é levar a cabo actuacións concretas que nos permitan acadar os obxectivos que nos marcamos no Plan Estratéxico do IIM, elaborado este ano e que, unha vez aprobado polo claustro, entrará en vigor ata 2026”, explica Saborido, quen engade que “entre os obxectivos desta dirección para os próximos anos está seguir a impulsar a ciencia de calidade, buscando un entorno sostible dentro e fóra do ámbito laboral, e a consecución dun fito importante: a transferencia do IIM á súa nova sede na ETEA (Teis)”.
“O papel da dirección é actuar como unha ‘gran unidade ao servizo da investigación do IIM’. Por iso, o proxecto debe crear, desenvolver ou reforzar as ferramentas para acadar a misión do IIM, xerar e transferir coñecemento para crear unha sociedade máis sostible”, sinala o director.
O equipo directivo que o acompañará durante os próximos catro anos cambia na súa estrutura e membros.
A vicedirección de Investigación chámase agora Estratexia e Transferencia Científica, coa investigadora Marta López Cabo, xefa do grupo de Microbioloxía e Tecnoloxía dos Produtos Mariños, como responsable. Substitúe así a Eva Balsa Canto.
A vicedirección adxunta de Organización Institucional (antiga vicedirección de Organización) segue a estar dirixida por José M. Fernández Babarro, responsable do grupo de Ecofisioloxía, Biomarcadores e Xestión Sostible de Bivalvos. A ela únese a nova vicedirectora adxunta de Infraestruturas e Sostibilidade coa investigadora Sonia Dios Vidal, do grupo de Patobioloxía Molecular Mariña, á fronte.
Continúa a vicedirección de Cultura Científica, dirixida por Xosé Pintado Valverde, investigador en Ecoloxía e Recursos Mariños, que xa iniciou o proxecto desta vicedirección hai catro anos. Isto consolidouse coa creación e acreditación, por parte da Fundación Española de Ciencia e Tecnoloxía (FECYT), da Unidade de Cultura Científica (UCC+I) do IIM. “É a segunda Unidade deste tipo do CSIC de Galicia e a primeira propiedade dun instituto do CSIC na comunidade”, destacan dende o IIM.
Un proxecto con catro obxectivos para acadar a misión do IIM
O primeiro gran obxectivo do proxecto de xestión será completar o traslado do instituto á súa nova sede na antiga ETEA, no barrio de Ríos (Teis, Vigo). A sede actual do Instituto estaba prevista para 150 persoas, un número moi superado polos máis de 200 membros do persoal actual.
En segundo lugar, busca promover a ciencia de calidade, innovadora e sostible, “con un cadro de persoal competitivo, unha estratexia común de investigación e un incremento da nosa tasa de innovación, transferencia e asesoramento para a sostibilidade”, sinala Francisco Saborido Rey.
En terceiro lugar, buscarán fortalecer as interaccións estratéxicas en tres áreas xeográficas altamente competitivas: a eurorrexión Galicia-Norte de Portugal, o conxunto do Estado e o ámbito internacional. “Así, búscase establecer e incrementar os grandes avances acadados na última dirección coa creación de unidades especializadas e a execución de actuacións enfocadas a mellorar as conexións do IIM coa cultura, a sociedade, a administración, a política, a xestión, a industria, a tecnoloxía. e mercados, entre outros sectores”, destacan do equipo directivo.
“Un dos nosos obxectivos é promover a Galicia como polo internacional da investigación mariña, reforzando a colaboración cos organismos de investigación da Xunta de Galicia, as tres Universidades e cos nosos compañeiros do IEO. Esta colaboración terá especial relevancia en Vigo, coa Universidade, orientadas ambas institutcións a consolidar o campus científico mariño na ETEA e situando á cidade á cabeza da investigación mariña”, explica Saborido, quen sinala neste sentido que a dirección do IIM coordina o Programa de Ciencias Mariñas de Galicia, dotado con 10 M€ e no que participan todas as institucións de investigación mariña na comunidade.
Por último, co apoio da nova vicedirectora, procurarase buscar un ambiente de traballo sostible, con condicións xustas e axeitado á realidade do Instituto. Tal e como sinala o novo equipo, “calquera reto que pretenda afrontar retos científicos e tecnolóxicos só se pode levar a cabo nun ambiente de traballo digno, xusto, verde e dixital”.
Francisco Saborido Rey (Ares, 1966)
Francisco Saborido Rey (Ares, 1966) é licenciado (1988) e doutor (1994) en Bioloxía pola Universidad Autónoma de Madrid. Comezou a súa labor investigadora no IIM en 1989. En 2006 obtivo unha praza de científico titular do CSIC no citado centro. Entre 2012 e 2015 desenvolveu o seu traballo de investigación na Universidade de Ciencia e Tecnoloxía Rei Abdullah de Arabia Saudita mediante unha estadía de investigación.
As súas liñas de investigación abordan o estudo da ecoloxía pesqueira de especies explotadas (bacallau, fletán groenlandés, a galiña de mar e pescada) pero tamén das especies costeiras e tropicais, co fin último de asesorar ao Estado dos recursos e medidas para lograr unha explotación sostible.
Foi responsable do grupo de investigación de Ecoloxía Pesqueira (2000-2008), ano no que dito grupo se integrou no grupo de Ecoloxía e Recursos Mariños, do que foi responsable ata 2018, ano no que asumiu a dirección do IIM e cedeu a dirección do grupo ao investigador Graham Pierce.
Participou en 75 proxectos de investigación, dos que dirixiu 52, 32 deles internacionais. A súa produción científica inclúe 158 publicacións e 83 traballos, así como a dirección de nove teses de doutoramento.