A presenza do Instituto no encontro incluíu a conferencia inaugural de Antonio Figueras e a participación de Xosé Antonio Padín Álvarez, Xosé Antón Álvarez Salgado e Carlos Vilas, ademais de diferentes comunicacións en panel
A participación do Instituto de Investigacións Mariñas (IIM-CSIC) no XXVIII Foro dos Recursos Mariños e da Acuicultura das Rías Galegas (ForoAcui), celebrado os días 1 e 2 de outubro no Grove, pechouse cun recoñecemento destacado: o primeiro premio ao mellor panel foi para un traballo con participación de investigadores do IIM-CSIC sobre o desenvolvemento dunha acuicultura máis sostible e preparada para o cambio climático.
O traballo, titulado «Hacia una acuicultura gallega más sostenible y preparada para el cambio climático: Acondicionamiento térmico de Saccharina latissima y su aplicación en sistemas de Acuicultura Multi-Trófica Integrada», recibiu o primeiro premio do ForoAcui, dotado con 250 euros. Entre os seus autores figuran os investigadores do IIM-CSIC Gonzalo del Olmo, Jorge C. Santamaría e José Pintado, xunto con investigadores doutras institucións.
O traballo aborda o potencial da macroalga Saccharina latissima para contribuír a unha acuicultura máis sostible e resiliente fronte ao cambio climático. A investigación estuda o acondicionamento térmico desta especie e a súa posterior aplicación en sistemas de acuicultura multitrófica integrada, nos que o cultivo de algas pode contribuír á retirada de nutrientes e á xeración de biomasa de interese.
A presenza do IIM-CSIC no ForoAcui estivo tamén representada na programación científica do encontro. Antonio Figueras Huerta, profesor de investigación do Instituto, foi o encargado da conferencia inaugural, titulada «As rías galegas como laboratorio ambiental: o que nos está dicindo o mar», na que abordou as rías galegas como espazos privilexiados para observar os cambios ambientais que afectan aos ecosistemas mariños. IIM CSIC
Pola súa banda, Xosé Antonio Padín Álvarez, investigador do IIM-CSIC, moderou a mesa dedicada á pesca de baixura e o marisqueo, na que se analizaron diferentes experiencias e retos aos que se enfronta o sector. IIM CSIC
Na segunda xornada, Xosé Antón Álvarez Salgado, profesor de investigación do IIM-CSIC, participou na mesa «Adaptación da acuicultura ao cambio climático: novas especies e/ou técnicas de cultivo», coa intervención «Fronte ao cambio climático na acuicultura: o poder da colaboración entre ciencia e sector». Neste espazo presentáronse tamén resultados do proxecto OCCAM, no que participa o IIM-CSIC, relacionados coa adaptación da acuicultura ás novas condicións ambientais. Entre os casos de estudo galegos abordados atópanse a adaptación do cultivo de troita ao aumento da temperatura e aos episodios de seca, así como diferentes estratexias para facer fronte aos efectos do cambio climático no cultivo do mexillón.
A programación contou tamén coa participación de Carlos Vilas, científico titular do IIM-CSIC, na sesión dedicada á intelixencia artificial e a internet das cousas (IoT), na que presentou a comunicación «Aplicacións da IA en produtos da pesca e da acuicultura: calidade e clasificación de especies». IIM CSIC
Comunicacións dos equipos do IIM-CSIC
Xunto ás intervencións no programa oficial, diferentes equipos do IIM-CSIC estiveron presentes no encontro a través de comunicacións en panel e póster, achegando resultados de investigación desenvolvidos no Instituto.
Entre elas estivo a presentación do proxecto RIFA, centrado no estudo da resposta inmune da ameixa rubia (Polititapes rhomboides) fronte a diferentes factores ambientais. O proxecto, desenvolvido polo IIM-CSIC en colaboración co sector marisqueiro, contou no ForoAcui coa presenza de representantes da Confraría de San Xosé de Cangas e da Asociación de Marisqueo a Flote da Ría de Vigo.
No marco do proxecto Climanage, presentouse un traballo centrado en establecer a importancia do tamaño do mexillón e da localidade de cultivo na eficiencia reprodutiva, analizando tanto a capacidade de produción de gametos sexuais como o éxito da reprodución e o posterior asentamento das larvas.
Tamén estivo representado o proxecto ZAMFER, financiado a través da convocatoria REDEMAR, con dous pósters nos que se avanzaron resultados preliminares sobre a dinámica poboacional da zamburiña na ría de Ferrol e as súas preferencias de substrato, de cara ao deseño de futuras estratexias de restauración.
A presenza dos equipos do IIM-CSIC completouse cun panel do proxecto Bivalfood.
A participación do Instituto nesta XXVIII edición de ForoAcui reflicte así a diversidade de liñas de investigación desenvolvidas no IIM-CSIC e a súa conexión cos principais retos aos que se enfrontan actualmente os recursos mariños e a acuicultura: desde o impacto dos cambios ambientais nas rías galegas ata a adaptación ao cambio climático, a sustentabilidade dos sistemas de cultivo, a saúde dos recursos marisqueiros e a aplicación de novas tecnoloxías.
O primeiro premio ao mellor panel supón, ademais, un recoñecemento ao traballo desenvolvido neste ámbito e á colaboración entre diferentes equipos de investigación para avanzar cara a unha acuicultura galega máis sostible e preparada para os efectos do cambio climático.
