🗺️ Na Pérgola da rúa Eduardo Cabello, en Bouzas (Vigo, Pontevedra).

🗓️ 8 de xuño | ⏰ De 10 a 13:30h e de 16 a 19:30h

☔ Teremos unha carpa para protexer as actividades da choiva.

Mapa en Google Maps


O Instituto de Investigacións Mariñas do CSIC, en Bouzas, celebrará o próximo 8 de xuño o Día Mundial do Océano coa primeira edición da Feira do Océano, unha feira de divulgación científica onde o IIM-CSIC sae a rúa para atoparse coa veciñanza de Bouzas e os arredores.

No evento, o publico poderá achegarse as carpas onde o persoal do IIM amosará o seu traballo con exposicións, obradoiros, actividades, e unha serie de sorpresas que farán que calquera persoa, de calquera idade, poda achegarse un pouco máis a como vemos, dende a ciencia, todo o que rodea ao océano.

Ademais, contaremos cun invitado de honra, xa que Rogelio Santos Queiruga (@QueirugaRogelio), mariñeiro, pescador e divulgador en redes nos acompañará toda a xornada para darnos a súa perspectiva sobre o consumo responsable e a sostibilidade dende a carpa do proxecto SeaFood Age (Interreg Atlantic Area).


Un completo programa de mañá e tarde

A feira comezará pola mañá, de 10 a 13:30 horas, cando contaremos coa participación de centros escolares invitados. Polo serán, de 16 a 19:30 horas estará aberto ao público en xeral. 

Obradoiros

A maioría presentes durante a mañá e a tarde. Algúns poden alternarse.

  • Elixe unha alimentación intelixente con SeafoodAge e Rogelio Santos Queiruga

    • Todo o día ☀️🌅
    • A actividade mostrará varios dos resultados do proxecto dende o mar á mesa: a produción de ingredientes e alimentos de orixe mariña utilizando conceptos de economía circular, o uso de técnicas baseadas en ADN para a identificación de ingredientes ou unha etiqueta intelixente que permite monitorizar a calidade de alimentos ao longo da cadea. E algunha sorpresa máis.
    • Co proxecto SeaFoodAge (Interreg Atlantic Area) e o pescador e divulgador, Rogelio Santos Queiruga!
  • Leituga de mar: unha alga cosmopolita ao rescate da acuicultura.

    • Todo o día ☀️🌅
    • No obradoiro, as algas do xénero Ulva serán as protagonistas! Vaise falar sobre as aplicacións en acuicultura destas algas tan cosmopolitas. En Galicia atópanse nas praias algunhas especies: Ulva  rigida e australis. E ainda que son responsables de fenómenos de eutrofización, causando danos ao ecosistema e afectando as praias, tamén posúen un grande potencial económico en moitas industrias, dende a saúde e alimentación ata a produción de bioplásticos e enerxía.
    • Co proxecto ULVAQUO (MINCIU).
  • Cantos superpoderes do mexillón coñeces?

    • Polo serán 🌅
    • Super-adherencia, super-resistencia, super-alimento e moitos máis segredos agochados dentro dos mexillóns que estamos acostumados a ver nas nosas costas, nas nosas praias e nas nosas bateas. Neste taller vanse comentar algúns destes aspectos, e incluso os probaremos en directo!
    • Co proxecto STRAUSS (MICIN e AEI)
  • Manifesto océano!

    • Pola mañá ☀️
    • Colabora na realización de experimentos relacionados co movemento das masas de auga no océano, que permitirán entender a circulación global oceánica e as correntes mariñas nas nosas rías. Así mesmo, poderán coñecer as diferentes tarefas que desenvolven neste grupo de investigación (campañas oceanográficas, análises de laboratorio, etc.) cunha exposición fotográfica.
    • Coa participación do proxecto "Manifesto Océano" e o grupo de Procesos Oceánicos en Cambio Global.

Exposicións

  • E que rico sabe o mar!

    • Todo o día ☀️🌅
    • Contaremos cunha exposición permanente durante toda a xornada na que todos os visitantes poderán ler o novo cómics do IIM-CSIC: "E que rico sabe o mar!". Segue as aventuras de Javi, Aldara e Helena nesta iniciativa e financiada pola Fundación General CSIC no marco da convocatoria CuentaLaCiencia. A historia levaráche polo camiño dos alimentos de orixe mariña procedentes da pesca e da acuicultura, e ten como fío condutor a investigación desenvolvida desde no eido do estudo dos procesos biolóxicos e a tecnoloxía de alimentos do IIM-CSIC.

Encontro con Rogelio Queiruga

Rogelio Santos Queiruga, no barco, con dúas centolas.
  • Todo o día ☀️🌅
  • [Na actividade de SeaFood Age] O coñecido mariñeiro Rogelio Santos Queiruga estará, todo o día presente na nosa feira, dentro da actividade desenvolvida polo proxecto SeaFood Age. Non o perdas e ven ver todo o que ten que contar sobre pesca, ciencia e sostibilidade! Rogelio leva 27 anos, dos seus 45, traballando como mariñeiro, pescador e divulgador #EnGalego dos valores mariñeiros e da pesca. Promotor da sostibilidade, a ciencia, e o consumo responsable como chaves para un futuro mellor.

 

More