Cultura científica e ciencia cidadá
Dende os seus inicios, a ciencia baseouse en compartir resultados e dialogar activamente dentro da comunidade científica.
Hoxe en día, as institucións científicas traballan activamente para incluír o conxunto da sociedade neste diálogo, para así entender as principais preocupacións das comunidades que as arrodean e tentar dar respostas ás súas incertezas.
No Instituto de Investigacións Mariñas, cremos que incluír a sociedade no noso traballo non é só un deber senón unha escolla sabia e indispensable. Queremos transformar o xeito no que se fai e se comparte a nosa ciencia, impulsando novas iniciativas e brindando apoio ao noso persoal investigador para que inclúa elementos de cultura científica nos seus proxectos, de acordo coas directrices que enmarcan a I+D europea actual.
Como parte dos nosos esforzos por fomentar a cultura científica arredor do noso traballo, apostamos pola Ciencia Cidadá como potente ferramenta para implicar as persoas "de fóra" do mundo científico e académico na produción de ciencia mariña de calidade. Ofrecemos orientación e apoio aos nosos grupos de investigación para implantar elementos deste tipo de participación pública, seguindo directrices internacionais como os principios ECSA de Ciencia Cidadá (2015).
Aquí poderás atopar algúns proxectos desenvolvidos polos nosos grupos de investigación nos que a nosa Unidade de Cultura Científica (UCC+i) identificou elementos de Ciencia Cidadá. Pode que non sexan estritamente proxectos de Ciencia Cidadá, pero representan un primeiro paso no noso camiño cara a unha ciencia mariña aberta e participativa.
<p>Herramientas innovadoras aplicadas al monitoreo de poblaciones en el entorno de un Área Marina Protegida: inteligencia artificial GENética y Telemetría Acústica</p>
