Bioquímica de Alimentos
A importancia dos produtos do mar na nutrición das nosas comunidades, xunto co impacto que poden ter sobre o medio ambiente, fai necesarias actuacións que aumenten a nosa seguridade de cara ao seu consumo ao tempo que diminúan o seu custo ecolóxico.
O Grupo de Bioquímica de Alimentos do IIM-CSIC traballa no desenvolvemento de ferramentas e bioprocesos para demostrar que é posible acadar un sector pesqueiro sostible, responsable e resiliente mediante a promoción do uso integral dos descartes e subprodutos pesqueiros e o desenvolvemento de ferramentas baseadas en marcadores moleculares para mellorar a súa trazabilidade e autenticidade. Con este obxectivo, o grupo de Bioquímica de Alimentos investiga arredor de tres liñas de traballo principais.
A primeira liña céntrase no desenvolvemento de ferramentas analíticas que permitan identificar e cuantificar organismos mariños grazas a marcadores xenéticos moleculares e controlar así a trazabilidade e o etiquetado dos produtos do mar. O grupo contribúe a mellorar a trazabilidade e sustentabilidade dos produtos do mar mediante o desenvolvemento de ferramentas para previr o fraude alimentario.
A segunda liña busca desenvolver bioprocesos para pór en valor os descartes e subprodutos pesqueiros. Deste xeito, o grupo pretende obter compostos bioactivos, como o coláxeno, a quitina ou os hidrolizados de proteínas de peixe, que son de utilidade en diversas aplicacións industriais.
Por último, a terceira e non menos importante liña de traballo consiste no desenvolvemento de ferramentas e infraestruturas electrónicas para cuantificar as capturas totais e analizar as condicións espazotemporais óptimas que contribúen a unha meirande eficacia das estratexias de pesca.
