Bioxeoquímica Mariña
Coñecer a composición química do medio mariño, a concentración dos diferentes elementos e as interaccións que ocorren nas zonas costeiras e que xeran cambios nos hábitats mariños é chave para que as poboacións costeiras poidan vixiar, predicir e adaptarse ao cambio global.
O Grupo de Bioxeoquímica Mariña (BGQM) centra a súa investigación nos ciclos bioxeoquímicos de elementos minoritarios (como o nitróxeno, o fósforo ou o selenio) e traza (incluídos os elementos bioactivos, os do grupo do platino e as terras raras) que se atopan no océano, ademais de explorar os intercambios na interface terra-océano e as influencias antropoxénicas nos devanditos ciclos.
A colaboración internacional é fundamental para afrontar os desafíos do cambio global e avanzar no coñecemento dos nosos océanos. Polo tanto, o grupo aborda o estudo dos procesos bioxeoquímicos de acordo coas pautas establecidas por programas internacionais como Future Earth Coasts (anteriormente coñecido como LOICZ) e GEOTRACES. Ademais, colabora con persoal científico experto en xeoloxía e bioloxía, tanto en España como a nivel internacional.
