Ciencia cidadá na Microrreserva da praia de Lourido
Todos os sábados, de xullo e agosto, e en horario continuado entre as 11 e a 13h, o proxecto Microrreservas de Praia (FECYT) realizará obradoiros na microrreserva creada nas dunas de Lourido, no Concello de Nigrán.
![Praia](/sites/default/files/styles/noticia_full/public/2022-07/Imaxes%20de%20Eventos%20-%20780x500%20px%20%281080%20%C3%97%20567px%29%20%2811%29.jpg?itok=J64_GQaQ)
Os talleres de Ciencia Cidadá nas Dunas de Lourido realizaranse todos os sábados de xullo e agosto en horario continuado de 11:00 a 13:00h para todas as idades, e correrán a cargo do equipo de traballo de Hydrosphere (unha spin-off da Universidade de Vigo), a propia Universidade de Vigo (coa participación do Centro de Investigación Mariña e do grupo de Xeociencias Mariñas e Ordenación do Territorio) e o Consello Superior de Investigacións Científicas a través de dúas unidades de Cultura Científica (CSIC en Galicia e Instituto de Investigacións Mariñas).
Os obradoiros céntranse tanto na zona das dunas como na zona de arribazón (onde chegan as algas á costa).
⛱️ Actividades na zona de dunas | Observa e identifica a flora e fauna da duna, contribue á biodiversidade plantando especies autóctonas e eliminando invasoras.
🌊 Actividades na zona de arribazón | Recolle as algas que chegan do mar e identifícaas, realiza unha mostraxe científica para observar a macrofauna da rexión, identifican a especie e as relacións con outras especies (a taxonómía), caza microplásticos na area e avalía o seu impacto no medio.
Ademais, o persoal investigador tamén traballará ao longo do areal para estudar o tipo de sedimento e a súa orixe e para realizar perfís topográficos que acheguen información sobre a morfoloxía da praia e a súa dinámica.
Inscrición por orden de chegada ata completar aforo (máx. 12 persoas)
Saca un #CoastSnap e fai ciencia dende a praia!
![Imaxe da base CoastSnap en Praia América](/sites/default/files/inline-images/CoastSnap.jpg)
Xunto coas actividades relacionadas coa Microrreserva de Lourido, poderás atopar un tótem bastante especial.
Este poste é unha nova base galega do proxecto #CoastSnap de "Centinelas da Costa". Só co teu móbil poderás contribuír a un proxecto científico real para facer un seguimento da evolución da costa ao longo do tempo.
Tira unha foto-snap co teu móbil usando a base, súbeo á aplicación de CoastSnap e fai avanzar a #ciencia baixo o sol do verán!
Descarga CoastSnap para Android
Sobre o proxecto | Microrreservas de praia
O proxecto (financiado pola Fundación Española para a Ciencia e a Tecnoloxía-Ministerio de Ciencia, Innovación, e o Concello de Nigrán) pretende crear unha pequena reserva natural en plena Praia América, en Nigrán.
O obxectivo deste proxecto de comunicación científica é cambiar o concepto que se ten das praias e dos sistemas dunares como espazos puramente dedicado ao lecer, por outro máis sostible centrado no valor ecolóxico destes fráxiles ecosistemas litorais.
O proxecto Microrreservas de Praia permitirá crear un espazo para a recuperación das ‘Dunas de Lourido’, que se converterá nunha aula aberta na que se poderá compartir coa sociedade todo o traballo científico e técnico que se fai desde as institucións participantes. Ademais, poderase observar a evolución das dunas e ser testemuñas de como o ecosistema se renaturaliza ao longo do tempo.
Durante todo o proxecto buscarase a participación cidadá e levarán a cabo talleres didácticos e actividades que permitirán coñecer máis sobre estes ecosistemas, a importancia da súa conservación e da recuperación destes espazos.