Química de Produtos Mariños
O Grupo de Química de Produtos Mariños do IIM, tamén coñecido como QPM, reúne tres piares fundamentais para poder subministrar os mellores produtos do mar.
A calidade, a seguridade e o valor nutricional. A nutrición é unha das funcións chave da vida e o océano xoga un papel fundamental na subministración de produtos para unha dieta equilibrada.
Porén, garantir a calidade destes produtos é unha tarefa complexa pero de grande importancia. O IIM-CSIC, a través do seu grupo de Química de Produtos Mariños (QPM), traballa no desenvolvemento de novos métodos para preservar a calidade orixinal do produto. O seu traballo de investigación presta especial atención á química e bioquímica dos produtos, ás potenciais alteracións sufridas durante o procesamento e á conservación e o potencial impacto destas sobre a saúde de quen os consume.
Como resultado, o grupo é capaz de proporcionar novas solucións para conservar a calidade dos produtos durante o procesamento grazas ao uso de altas presións e á adición de antioxidantes naturais. Tamén se apoia na proteómica para estudar as alerxias e os parasitos alimentarios, como o anisakis, así como a resposta inmunitaria que inducen. Ademais, o grupo QPM concéntrase no estudo dos ácidos graxos poliinsaturados e o seu impacto sobre o metabolismo e a saúde tanto humana como do gando.
O grupo desenvolveu tamén diversas plataformas de proteómica e lipidómica para estudar a relación entre o consumo de produtos do mar e a saúde humana.
