Laboratorio de Biotecnoloxía Acuática
O noso laboratorio estuda a cuestión fundamental de como se regula o desenvolvemento dos organismos complexos, utilizando como modelos o rodaballo e o peixe cebra.
O principal obxectivo científico do Laboratorio de Biotecnoloxía Acuática é aplicar enfoques moleculares e celulares ao estudo das fases iniciais do desenvolvemento de peixes e das enfermidades que lles afectan, así como aplicar ciencia básica para mellorar o rendemento, a eficacia e a sostibilidade da acuicultura mariña a nivel global.
A investigación do noso laboratorio céntrase de forma xeral en comprender o xeito no que as células utilizan correctamente a información codificada no ADN para levar a cabo as funcións fisiolóxicas necesarias durante as distintas fases do desenvolvemento.
A alteración ou interrupción destes mecanismos reguladores é responsable de moitas anomalías no desenvolvemento, como as deformidades morfolóxicas. Pretendemos descubrir como funcionan algúns destes mecanismos, o que á súa vez nos axudará a comprender a causa das anomalías asociadas. Utilizamos o peixe cebra (Danio rerio) e o rodaballo (Scophthalmus maximus) como modelos de sistema.
