Fotobioloxía e Toxinoloxía do Fitoplancto
O grupo de microalgas que conforman o fitoplancto mariño produce unha ampla variedade de metabolitos, entre os que se atopan pigmentos e toxinas.
O seu estudo ten importantes consecuencias para a conservación e a saúde do medio ambiente e da sociedade humana.
O Grupo de Fotobioloxía e Toxinoloxía do Fitoplancto explora as relacións entre a bioloxía das microalgas e a produción destes metabolitos, prestando especial atención aos efectos dos factores medioambientais, especialmente a luz e os factores relacionados co cambio global, e estudando o fitoplancto dende diferentes perspectivas: a fotobioloxía, a química dos produtos naturais, a taxonomía e quimiotaxonomía, os ciclos vitais, etc.
Os pigmentos producidos polas microalgas forman os chamados sistemas de pigmentos. O grupo de investigación traballa para caracterizar as moléculas de clorofila e carotenoides que compoñen estes sistemas, relacionando a súa síntese e a súa interconversión con procesos que implican a acción da luz, tales como a fotocaptura, fotoprotección, fotoaclimatación ou fotoadaptación. Tamén estuda a distribución destes pigmentos en diferentes categorías taxonómicas de algas para os utilizar como biomarcadores no estudo de poboacións de organismos planctónicos en augas naturais.
No eido da toxicoloxía, leva a cabo estudos de episodios de toxicidade causados polo fitoplancto, que teñen importantes consecuencias para os sectores produtivos que dependen do mar e orixinan riscos para a saúde. Así, propón a caracterización e determinación de biotoxinas mariñas, relacionando a súa produción coa bioloxía das microalgas, estudando os principais síndromes (PSP, ASP e DSP) que afectan as rías galegas e explorando episodios de toxicidade problemáticos que teñen lugar noutras rexións, como por exemplo os producidos por brevetoxina, palitoxina, ostreocinas, ciguatoxinas, azaspiracidas, iminas cíclicas e toxinas emerxentes.
O grupo utiliza innovadoras metodoloxías de análise que, en moitos casos, conducen á detección de compostos con estruturas aínda non descritas. Ademais, conta cunha longa tradición na colaboración con outros grupos de investigación, formando parte da Unidade Asociada de Fitoplancto Tóxico xunto co Centro Oceanográfico de Vigo (IEO, CSIC), ofrecendo asesoramento científico e contribuíndo a bases de datos globais de algas tóxicas, tales como a Base de Datos de Episodios de Toxicidade de Algas (Harmful Algal Event Database, HAEDAT) ou o Listado taxonómico de referencia de microalgas tóxicas (Taxonomic Reference List of Harmful Micro Algae) da COI-UNESCO.
