Comité de Igualdade e Diversidade
Como persoas dedicadas a investigarmos o mundo que nos rodea, no IIM-CSIC coñecemos ben a diversidade que se dá na natureza e sabemos que a comunidade científica non é unha excepción.
Por este motivo xurde o Comité de Igualdade e Diversidade, un equipo que trata de aplicar medidas que axuden a resolver conflitos e fagan patentes os problemas relacionados coa discriminación por xénero, raza ou diversidade afectivo-sexual na ciencia.
O grupo de traballo esfórzase por evitar estes comportamentos e facilitar información ao respecto. Traballa desenvolvendo protocolos e implantándoos no noso centro, creando así un espazo seguro e aberto para todas as persoas que traballan aquí facendo ciencia (persoal técnico, investigador e de todo o resto de áreas).
O comité está establecido como un dos Comités de Igualdade e Diversidade dos ICUs do CSIC e busca aliñar o Instituto cos programas e obxectivos internacionais e estatais en materia de igualdade e diversidade. Isto inclúe os Obxectivos de Desenvolvemento Sostible, como o ODS-5: Igualdade de xénero, os obxectivos marcados polo Espazo Europeo de Investigación (ERA) e pola Comisión Europea para todo o espazo europeo de investigación e innovación e os mandatos legais que nos marca a lexislación española en materia de igualdade e protección e inclusión da diversidade.
O equipo de igualdade e diversidade do IIM traballa seguindo a estela e procurando a coordinación con outras entidades: por exemplo, con outros comités do CSIC, como o Comité Mulleres e Ciencia do CSIC, asociacións afíns como PRISMA - Asociación para la Diversidad Afectivo-Sexual y de Género en Ciencia, Tecnología e Innovación e iniciativas con ampla traxectoria como a Iniciativa 11F ou Oceánicas, desenvolvida polo IEO-CSIC.
