Laboratorio de Xeoquímica Orgánica
Malia a súa abundancia, a súa importancia nos ciclos bioxeoquímicos e a súa sensibilidade ao cambio global, o noso coñecemento da composición, estrutura molecular e reactividade da materia orgánica disolta (MOD) nos océanos aínda é deficiente.
O obxectivo fundacional do Laboratorio de Xeoquímica Orgánica do IIM-CSIC é encher esta lagoa do noso coñecemento illando a MOD, analizando a súa composición elemental e as súas propiedades ópticas, isotópicas e estruturais e facendo un seguimento da súa alteración por procesos fotoquímicos e microbiolóxicos.
Dende o punto de vista xeográfico, centrámonos na costa noroeste da Península Ibérica como modelo de interaccións entre o medio terrestre e o oceánico, incluídos os afloramentos costeiros, e de distintos graos de alteración humana; tamén traballamos sobre o Atlántico Noroeste como modelo de augas abertas.
Dende o punto de vista metodolóxico, combinamos a observación, a experimentación e a modelaxe paramétrica e inversa para desentrañar as relacións entre a diversidade molecular e microbiolóxica nun océano que está a experimentar importantes cambios.
O Laboratorio de Xeoquímica Orgánica céntrase tamén na avaliación da regulación e provisión de servizos ecosistémicos por parte das rías, grandes estuarios con alta produtividade que se atopan ao longo da costa galega; isto inclúe a cuantificación de mecanismos de fertilización diferentes do afloramento costeiro.
Estudamos lugares pouco explorados de grande importancia para a bioxeoquímica do carbono (p. ex., pradarías de fanerógamas mariñas ou sedimentos costeiros de alta permeabilidade) para ampliar o noso coñecemento sobre o funcionamento da mecánica costeira.
Tamén avaliamos os riscos asociados co cambio global e climático e impulsamos a adopción de medidas de adaptación para garantir os bens e servizos costeiros e mariños de cara ás vindeiras décadas. Entre eles están a explotación sostible dos recursos vivos das rías, para o que colaboramos estreitamente con outros grupos de investigación do Instituto de Investigacións Mariñas, contribuíndo así a un enfoque ecosistémico das actividades de acuicultura e pesca artesanal na rexión.
