Ecofisioloxía, Biomarcadores e Xestión Sostible de Bivalvos
A economía azul en Galicia non pode entenderse sen os bivalvos.
Dende os mexillóns cultivados nas numerosas bateas que poboan as rías ata as vieiras e ameixas, os bivalvos son unha das pezas chave da acuicultura da Comunidade Autónoma. A súa importancia estratéxica fai necesario o estudo exhaustivo das interaccións ecolóxicas dos cultivos de bivalvos para avaliar os efectos que podería ter o cambio climático sobre eles, co fin de desenvolver ferramentas novas e máis sostibles para a xestión da acuicultura.
Seguindo esta liña de traballo, o grupo de Ecofisioloxía, Biomarcadores e Xestión Sostible de Bivalvos do IIM-CSIC (tamén coñecido como EsMaBa) investiga este campo de estudo estratéxico, cun interese especial polo mexillón (Mytilus spp.).
O equipo investigador traballa para comprender a ecofisioloxía dos bivalvos, é dicir, como se ve afectada a súa fisioloxía polas condicións ambientais, e para desenvolver novos métodos de medición continua dos parámetros ecolóxicos que arrodean os animais de cultivo, como a valvometría. Por exemplo, o grupo estuda a bioquímica das secrecións dos bivalvos, como o biso ou as cunchas, e a forma na que o medio ambiente determina a súa dureza, un factor fundamental para garantir a correcta fixación dos mexillóns nas cordas de cultivo en batea.
Baseándose nos devanditos estudos ecofisiolóxicos, o grupo é quen de determinar o impacto do cambio climático e global, das bioinvasións ou doutras ameazas sobre as especies de bivalvo sometidas a explotación, así como modelar a capacidade de carga do ecosistema, facilitando así novas ferramentas de xestión da acuicultura que incorporan unha perspectiva ecosistémica.
