Microbioloxía e Tecnoloxía de Produtos Mariños
No noso esforzo por poñer a investigación e a innovación ao servizo da sociedade, no Instituto traballamos para garantir a seguridade e a calidade dos alimentos nos sistemas de produción.
Este é o obxectivo do Grupo de Microbioloxía e Tecnoloxía de Produtos Mariños, tamén coñecido como "MicroTEC". O grupo traballa para mellorar a calidade e seguridade do peixe e os produtos do mar segundo a estratexia "Farm to fork" ("da granxa á mesa"), garantindo a sostibilidade ao tempo que se mitigan os impactos do cambio climático e outros factores como a migración das poboacións ou a superpoboación.
A súa investigación no eido da seguridade dos alimentos céntrase actualmente na sociobioloxía das biopelículas que albergan a bacteria Listeria monocytogenes, tratando aspectos relacionados coa xenética, microscopia e ecoloxía destas comunidades. Ademais, o grupo estuda as interaccións tanto intra como interespecíficas dentro destas comunidades mixtas para contribuír ao deseño de protocolos de desinfección efectivos contra biopelículas, específicos para cada obxectivo e respectuosos co medio ambiente.
MicroTEC tamén coordina RISEGAL, a Rede Galega de Riscos Alimentarios Emerxentes, participando na identificación e caracterización de riscos emerxentes na cadea de produción alimentaria. A rede ten como finalidade anticiparse aos riscos para a saúde alimentaria asociados ao cambio climático e construír así novos sistemas de produción máis resilientes.
Por último, dentro do marco da Industria Alimentaria 4.0, a nosa investigación actual sobre calidade alimentaria está orientada ao estudo de tecnoloxías non invasivas, como a análise hiperespectral, para avaliar as propiedades organolépticas e a calidade dos produtos do mar nun intento por configurar un sistema agroalimentario intelixente e autónomo.
