Capacidades e produtos de innovación
- Software | MITS: algoritmo baseado en procura tabú para problemas non lineais enteiro-mixtos (MINLP)
Método descrito en: Exler, O., L.T. Antelo, J.A. Egea, A.A. Alonso and J.R. Banga (2008) A Tabu search-based algorithm for mixed-integer nonlinear problems and its application to integrated process and control system design. Computers & Chemical Engineering, 32(8):1877-1891.
O software está dispoñible baixo petición (escríbenos se che interesa).
- Capacidades | Ómica avanzada aplicada a organismos mariños
Estudos sobre a estrutura do xenoma de organismos mariños, incluído o mapeado xenético, a secuenciación de ADN, como se produce o conxunto completo de transcritos de ARN polo xenoma e como se ve afectado polo desenvolvemento, as doenzas ou os factores ambientais que determinan o fenotipo, especialmente a proteómica e a metabolómica, utilizando sempre as técnicas máis avanzadas (ATAC-seq, MethylCap-Seq, RNA-seq, tecnoloxía de ADN recombinante, CRISPR/Cas9 knockin e knockout , enhancer detector (ZED),tecnoloxías transxénicas Tol2 kit e BAC, etc.).
- Capacidades | Desenvolvemento de sistemas de control e optimización a nivel da planta completa na industria alimentaria
Modelaxe a múltiples escalas para flexibilizar a toma de decisións e optimizar procesos complexos (p. ex., esterilización) baseado no control da seguridade e calidade dos produtos alimentarios mediante técnicas non invasoras (sensores de software, etc.).
- Software | PREMER: inferencia rápida en redes con teoría da información
PREMER (Parallel Reverse Engineering with Mutual information & Entropy Reduction [enxeñaría inversa paralela con información mutua e redución de entropía]) é unha ferramenta de software multiplataforma de código aberto para inferencia de estruturas de redes a partir de datos mediante medidas de teoría da información. É unha ferramenta de uso xeral desenvolvida pensando en redes biolóxicas, pero pódese aplicar a outros campos.
Podes atopar máis información aquí.
- Capacidades | Desenvolvemento de sistemas de acuicultura multitrófica integrada
Optimización de sistemas de cultivo multitrófico en infraestruturas de acuicultura abertas e pechadas, dende os sistemas de recirculación en acuicultura de peixes e macroalgas, con especial interese no efecto dos microbiomas resultantes sobre o benestar animal, ata o axuste de sistemas de acuicultura de múltiples especies de baixo nivel trófico no océano.
- Software | ACOmi: optimización por colonia de formigas de problemas de programación non lineais enteiro-mixtos (MINLP)
O método descríbese en Schlater, M., J. A. Egea y J. R. Banga (2009). Extended ant colony optimization for non-convex mixed integer nonlinear programming. Computers & Operations Research 36(7): 2217-2229.
O software está dispoñible baixo petición (escríbenos se che interesa).
- Prototipo | MUSSEL-HFNI: biosensores de alta frecuencia non invasores (HFNI) e de baixo custo para seguimento en acuicultura
Dispositivo para facer seguimento do estado fisiolóxico de ata 64 bivalvos no seu sistema de cultivo en tempo real.
O sistema de seguimento baséase na análise dos micromovementos dos bivalvos relacionados coa apertura de valvas (valvometría). Estudos recentes confirmaron que esta é unha técnica moi prometedora para detectar proliferacións de algas nocivas e episodios de acidificación do océano.
O prototipo está actualmente en adaptación para mellorar a súa portabilidade e autonomía. Para máis información, escríbenos un correo electrónico.
- Capacidades | Incidencia de patóxenos e avaliación do risco
Detección e identificación de patóxenos en animais salvaxes e de cultivo, así como en produtos do mar. Avaliación da relación entre a incidencia de patóxenos e diversos aspectos medioambientais e fisiolóxicos para levar a cabo avaliacións do risco en relación con patóxenos obxectivo.
- Capacidades | Deseño de procedementos de desinfección e modelaxe para a prevención da resistencia a axentes antimicrobianos
Desenvolvemento de estratexias químicas (combinacións de desinfectantes, aceites esenciais) e biolóxicas (encimas, fagos) que sexan efectivas na eliminación de biopelículas monoespecíficas e mixtas en superficies usadas na industria alimentaria. Proba de biocidas e desenvolvemento de mellores estratexias de dosificación de biocidas para a industria alimentaria, garantindo a seguridade alimentaria ao tempo que se evita a adquisición de resistencia a axentes antimicrobianos.
- Software | BioPreDyn-bench: paquete de problemas de referencia para modelaxe dinámica en bioloxía de sistemas
BioPreDyn-Bench é un paquete de problemas de referencia para modelaxe dinámica en bioloxía de sistemas. Actualmente contén seis problemas complexos de estimación de parámetros que aspiran a servir de casos de proba de referencia neste eido. Este paquete inclúe modelos cinéticos a media e grande escala de células de E. coli, S. cerevisiae, D. melanogaster, ovario de hámster chinés (CHO) e unha rede de sinalización xenérica. O nivel de descrición inclúe o metabolismo, a transcrición, a transdución de sinais e o desenvolvemento.
Podes atopar máis información aquí.